Jón Bjarnason (andsvar):
Herra forseti. Ég vek athygli á því að aftur kemur hér fram í ræðum og nú hjá hv. síðasta ræðumanni að skilyrt er að til þess að hægt sé að ráðast í þessar vegaframkvæmdir þurfi að selja ríkisfyrirtæki. Það þýðir, herra forseti, að sá listi sem hér er verið að leggja fram hangir gjörsamlega í lausu lofti. Það fer nú að verða nauðsynlegt, herra forseti, að hæstv. samgrh. upplýsi hvort samgöngumálin og átak í samgöngumálum sé alfarið háð því að ríkisfyrirtæki séu seld og landsmönnum þannig stillt upp við vegg --- annaðhvort þetta eða ekki neitt --- eins og nú er að verða tískan.
Ég lít á þetta sem aðskilin mál, herra forseti, og það er til minnkunar fyrir okkur að hugsa með þeim hætti að ekki sé hægt að ráðast í framkvæmdir og áætlanagerð á vegum íslenska ríkisins án þess að verða að skilyrða það sölum á eignum þess.