[prenta uppsett í dálka] 76. fundur, 125. lþ.
Ísólfur Gylfi Pálmason (andsvar):
Herra forseti. Við getum lengi deilt um það hvort gæðin séu betri eftir því sem varan er ódýrari. Við höfum séð það t.d. í verslunum að í raun og veru er mjög lítill verðmunur á matvörum. Við áttum okkur ekki alltaf á þessum gæðamun vegna þess að umræðan er gjarnan þannig að menn hafa bara viljað bjóða sem ódýrasta vöru og þess eru jafnvel dæmi að menn sprauti vatni í vöru til þess að selja hana. Við getum í raun og veru deilt um þetta, hv. þm., í allan dag en það er gjarnan þannig að við borgum meira fyrir gæðavöru en vöru sem er lakari. Lakari vara er í flestum tilvikum ódýrari. Það sjá menn t.d. þegar þeir fara út í búð og velja sér rauðvín. Það er af mismunandi gæðum og menn borga fyrir mismunandi gæði í því. Rauðvín er landbúnaðarvara eins og hv. þm. veit.
(Forseti (GuðjG): Forseti minnir hv. þingmenn á að beina máli sínu til forseta eða fundarins en ekki til einstakra þingmanna.)
