Ásta R. Jóhannesdóttir (andsvar):
Herra forseti. Fjárhagsstaða foreldra langveikra barna er oft mjög slæm eftir langvarandi veikindi barnanna. Auðvitað er mjög mikil bót að fá þennan stuðning.
Aftur á móti vantar upp á veikindaréttinn og það kemur þessu frv. í raun ekki við því að það er annað mál sem þarf að taka á. En ég bendi á að taka þarf á þessum málum. 50 þús. kr. á mánuði eins og fólk kemur til með að fá til að vera hjá börnunum sínum er mikill stuðningur miðað við að það er ekki neitt í dag, og ég fagna því að það skuli vera gert.
En það að draga nýjan barnaspítala inn í málið þá skilst mér herra forseti, að á nýjum barnaspítala verði ekki viðbótarþjónusta heldur verði allri þjónustu, sem nú er veitt á mörgum stöðum, komið fyrir á einum stað, þannig að það er ekki viðbót. Ég er því ekki viss um að það eigi heima í þessari umræðu.