Guðmundur Hallvarðsson (andsvar):
Herra forseti. Ég verð að segja að mér kemur nokkuð spánskt fyrir sjónir að sjá í þessu nefndaráliti vitnað til einnar merkustu menntastofnunar hér á landi, Háskólans á Akureyri, þar sem talað er um að það sé ekki Veðurstofunnar eða annarra að gæta varðveislu íslenskra orða sem væntanlega eru dauðadæmd hvort eð er. Síðan segir, með leyfi forseta:
,,Nær væri fyrir flutningsmenn að hafa áhyggjur af talnalæsi Íslendinga og beita sér fyrir því að fólk fengi meiri og betri þekkingu í meðferð talna þar sem lífsmáti þjóðarinnar í framtíðinni byggist í æ ríkari mæli á því að geta metið upplýsingar á tölulegu formi, t.d. vindhraða í m/sek.``
Hvaða skilaboð er þessi menntastofnun að senda Alþingi? Er hún að segja okkur að það skorti eitthvað á þeirra eigin kennslu? Kannski að það sé líkt ástatt með þessa skóla og segir hér í greinargerð frá Veðurstofunni, með leyfi forseta:
,,... Veðurstofan stefnir að því að gefa út viðvaranir um hættulegar vindhviður sem gjarnan koma af fjöllum ...``
Það er einmitt svo með þennan málflutning. Hann kemur gjörsamlega af fjöllum frá þessum merka Háskóla á Akureyri.
En það er líka annað merkilegt þegar þessi ágæta Veðurstofa talar um að óeðlilegt sé að verið sé að rugla saman tölum. Þar segja menn, með leyfi forseta:
,,Vindstigin eða heiti þeirra hafa engin tengsl við slík vindfyrirbæri og vegna hins stutta tíma sem þessar hviður standa er eðlilegra að nota hraðaeininguna metra á sekúndu en kílómetra á klukkustund.``
Þeir eru sjálfum sér ósamkvæmir þarna hjá Veðurstofunni því þeir eru með tvær mælieiningar á sömu einingunni.