Arnbjörg Sveinsdóttir (andsvar):
Hæstv. forseti. Ekki ætlaði ég að draga úr þessum söguskýringum hv. þm. Þó er rétt að benda á að það var afgreiðslan á 356. máli á 123. löggjafarþingi sem varð niðurstaðan. Útkoman er því þessi. Það er alveg hárrétt að hv. þáv. þm. Magnús Stefánsson og fleiri lögðu fram tillögur um langtímaáætlun í jarðgangagerð eða eitthvað í þá veru sem var reyndar aldrei rædd í þinginu. Þegar málið var afgreitt í samgn. var að sjálfsögðu tekið tillit til annarra tillagna sem lágu fyrir og ekki ætla ég að draga úr því. En málið er að þetta var afgreiðsla á þessari tillögu okkar og ég held að það sé alveg augljóst mál ef menn vilja fletta upp í þingtíðindum að þannig er afgreiðslan á málinu. Við vorum flutningsmenn að tillögunni og vorum afskaplega sátt við niðurstöðuna. Það var gert í fullu samráði við okkur hvernig tillaga okkar var afgreidd og enginn ágreiningur þar um.