[prenta uppsett í dálka] 103. fundur, 125. lþ.
Þórunn Sveinbjarnardóttir:
Herra forseti. Mig langar til að nota tækifærið til þess að vekja athygli á því að sjö skýrslubeiðnir er að finna í skjölum Alþingis nú á 125. þingi. Þar af eiga hv. þm. Samfylkingarinnar fimm og þar af á ég tvær.
Þann 2. nóvember sl. voru samþykktar tvær beiðnir mínar um skýrslur, um eina frá heilbrrh. um ófjósemisaðgerðir sem gerðar voru samkvæmt lögum sem giltu á árunum 1938--1975, og hin er til umhvrh. um framkvæmd alþjóðasamninga um umhverfismál hér á landi.
Ég vil inna hæstv. forseta eftir því hvort þessar skýrslur muni líta dagsins ljós á 125. þingi hins háa Alþingis. Ég vil líka taka fram í umræðunni að nú líður að lokum fyrsta þings míns sem þingmanns og ég er mjög hugsandi yfir vinnubrögðum sem þessum og ég er ekki viss um að þetta mundi líðast í venjulegum fyrirtækjum á Íslandi.
