Frsm. meiri hluta efh.- og viðskn. (Vilhjálmur Egilsson):
Virðulegi forseti. Ég mæli fyrir brtt. og nefndaráliti við frv. til laga um breyting á lögum um brunatryggingar, nr. 48/1994.
Efh.- og viðskn. fjallaði um þetta mál. Það er flutt í tengslum við svokallaða Landskrá fasteigna sem verið er að koma á fót. Meginefni frv. er að hækka svokallað umsýslugjald sem á að nota til þess að fjármagna uppbyggingu á þessari svokölluðu Landskrá fasteigna.
Nefndin sendi málið til umsagnar til ýmissa aðila og fékk þá á fund við sig og þeirra er getið í nefndaráliti á þskj. 1055.
Nefndin gerði ákveðnar breytingar á frv. sem fólust aðallega í því að breyta eðli gjaldtökunnar þannig að umsýslugjaldið, sem yrði tímabundið gjald, yrði lagt á á árunum 2001--2004, sem þýddi að árið 2000 yrði gjaldið óbreytt, þ.e. 0,025, en á árunum 2001--2004, þessum fjórum árum, skyldi gjaldið vera 0,1 af brunabótamati. Vátryggingafélög innheimta þetta gjald samhliða innheimtu brunatryggingaiðgjalda og þetta umsýslugjald á að duga til þess að byggja upp hina svokölluðu Landskrá fasteigna sem allir eru sammála um að sé þjóðþrifamál.
Virðulegi forseti. Ég mæli fyrir hönd meiri hlutans í þessu máli, en hann skipa auk mín hv. þm. Kristinn H. Gunnarsson, Hjálmar Árnason, Sigríður Anna Þórðardóttir, Pétur H. Blöndal, Gunnar Birgisson og Ögmundur Jónasson, sem reyndar er með fyrirvara í málinu.