Þuríður Backman (andsvar):
Herra forseti. Ég gat ekki skilið orð hæstv. utanrrh. öðruvísi hér áðan en svo að hann teldi að nema mætti úr gildi lög um mat á umhverfisáhrifum framkvæmda. Í framhaldi af því skildi ég það svo að hann teldi varla eðlilegt að svo stór mál, virkjanir stórra vatnsfalla eins og Jökulsá á Fljótsdal, færu til skipulagsstjóra og síðan í úrskurð umhvrh. Þessum málum væri betur komið inni á þingi. Ég efast um þau vinnubrögð og tel að það sé ekki í samræmi við nútímavinnubrögð að viðhafa þann gang, enda eru virkjanaleyfin þegar að því kemur að veita virkjanaleyfi, veitt í þessum sal. Ég held að það sé þinginu alveg nóg verkefni.