Jón Bjarnason:
Herra forseti. Ég vildi kannski aðeins draga þetta mál lengra varðandi orkunotkunina í sjávarútveginum. Þetta er náttúrlega hluti af stjórn fiskveiða og við í Vinstri hreyfingunni -- grænu framboði leggjum áherslu á að fiskveiðin sé stunduð á þann hátt að sem best nýting sé á orkunni og leggjum þess vegna áherslu á strandveiðar, frá ströndunum sjálfum. Ég vil líka benda á fiskvinnsluna sjálfa. Hún er hluti af þessu. Ég held að það hljóti að vera áhyggjuefni og vil fara þess á leit við hæstv. sjútvrh. að hann taki líka með þá miklu orkunotkun sem fer í þá gífurlegu landflutninga á fiski landshornanna á milli sem hlýtur að vera hluti af þessu dæmi.