Ögmundur Jónasson (andsvar):
Herra forseti. Ég þakka hæstv. forseta Alþingis fyrir viðbrögð hans og sérstaklega er hann reifaði hugmyndir sem fram komu frá hv. þm. Vinstri hreyfingarinnar -- græns framboðs, Kolbrúnu Halldórsdóttur, um grænar skýrslur. Hann vakti athygli á nýmæli í samgrn. í þessu efni en ég legg áherslu á að hv. þm. Kolbrún Halldórsdóttir var í reynd að leggja til að með fjárlagafrv. kæmi á hverju ári eins konar græn bók þar sem þessi mál væru yfirfarin og reifuð.
Eins saknaði ég í máli hæstv. forseta Alþingis. Það eru viðbrögð við spurningum sem ég setti fram um afstöðu hans til þess að ríkisendurskoðandi tæki þátt í vinnunefndum á vegum framkvæmdarvaldsins og þá sérstaklega nefndum sem eru umdeildar eins og varðandi söluna á Landssímanum og ekki síður vinnunefnd sem vinnur nú að undirbúningi á samningi við Íslenska erfðagreiningu um miðlægan gagnagrunn á heilbrigðissviði.