Jón Bjarnason:
Herra forseti. Varðandi fjármagn til undirbúnings jarðgangagerðar samkvæmt fjármunum vegáætlunar er kveðið á um að fjármagn til jarðganga sé sérmerkt á fjárlögum. Þær tillögur um vegabætur með jarðgöngum sem lengst eru unnar eru um göng milli Fáskrúðsfjarðar, Reyðarfjarðar, Eskifjarðar og Norðfjarðar, jarðgöng til Siglufjarðar og síðan er áfram haldið á Vestfjörðum.
Til þess að slík jarðgangagerð geti komið til framkvæmda þarf að vinna heilmikla rannsóknar-, undirbúnings- og hönnunarvinnu. Samkvæmt þeim upplýsingum sem ég hef er hægt að hefja framkvæmdir á fullu við áðurnefnd jarðgöng á Austurlandi eftir eitt til tvö ár og á Siglufirði eftir tvö til þrjú ár, en til þess þarf að veita fé til undirbúnings og rannsókna. Annars er þetta verkefni stopp og það tel ég mjög alvarlegt, herra forseti, í þeim samgöngubótum sem við erum að vinna að.