Frsm. 1. minni hluta samgn. (Jón Bjarnason) (andsvar):
Herra forseti. Ég vil leiðrétta eða fyrirbyggja misskilning að Vinstri hreyfingin -- grænt framboð lagði ekki fram tillögur um skatta á þorskígildi, þannig að það sé bara alveg ljóst að við lögðum það ekki til.
Í öðru lagi lagði ég ekki til þær breytingar að sameina eða færa verkefni til Landhelgisgæslunnar frá Siglingamálastofnun. Hins vegar benti ég á tillögur þeirra og greinargerð sem bæri í sjálfu sér að skoða. Og ég leyfi mér því, herra forseti, að spyrja hæstv. samgrh.: Er ætlunin að skoða þær tillögur frekar, sem þarna eru lagðar fram?