[prenta uppsett í dálka] 76. fundur, 126. lþ.
Steingrímur J. Sigfússon:
Herra forseti. Í heild sinni er ekki fýsilegur kostur fyrir Ísland að gerast aðili að Schengen- og Dyflinnarsamningunum. Það hefur í för með sér óhemjumikinn kostnað. Atriðum sem lúta að meðferð persónuupplýsinga og persónuvernd er stórlega ábótavant í þessum málum báðum og stjórnskipuleg staða Íslands verður óheppileg vegna þess að hér er verið að fara bakdyramegin inn í tilteknar stofnanir Evrópusambandsins, ýmist þegar orðnar stofnanir Evrópusambandsins eða stofnanir sem innlimaðar verða í Evrópusambandið á næstu árum.
Herra forseti. Öll rök mæla því með því að staðfesta ekki samninginn en fela ríkisstjórninni þess í stað að tilkynna vörsluaðilum að Ísland muni fresta því um óákveðinn tíma að gerast aðili að Schengen-samstarfinu og meta stöðu sína á nýjan leik í heild sinni í þessu máli.
