Pétur H. Blöndal (andsvar):
Herra forseti. Það er alltaf spurning hve langt á að ganga í að hafa vit fyrir fólki, banna því og leyfa. Hér finnst mér of langt gengið. Ég er þeirrar skoðunar að ökumaður eigi að vita að hann á ekki að tala í síma undir stýri, það er hættulegt alveg eins og að borða eða drekka við akstur. Ég tel að hann beri sjálfur ábyrgð á því hvernig til tekst. Svona boð og bönn virka yfirleitt illa. Jafnvel þó þau séu skynsamleg og hægt að færa fyrir þeim rök er oft mun skynsamlegra að fara út í áróðursherferð og sýna fólki fram á að hlutirnir séu hættulegir, frekar en að vera með refsivöndinn og hóta refsingu.