Hjálmar Árnason (andsvar):
Herra forseti. Þetta er alveg hárrétt athugað hjá hv. þm. Guðjóni A. Kristjánssyni. Áfangakerfið er líklega ein mesta bót sem unnin hefur verið á íslenska skólakerfinu. Það kom fyrir um 25 árum inn í framhaldsskólann og er ein mesta réttarbótin fyrir nemendur í framhaldsskólum eins og hv. þm. nefndi hér, að geta sótt almennar greinar heima í héraði og síðan flutt þær með sér milli skóla, sem ekki er hægt í bekkjakerfinu. Þess vegna tek ég undir það með hv. þm. að áfangakerfið leysir þennan vanda að hluta.
Það breytir hins vegar ekki því að hinar almennu starfsgreinar í samfélaginu sjást ekki. Það eru einfaldlega ekki til brautir fyrir þessar starfsgreinar í framhaldsskólakerfinu og eru þá ónefndir ýmsir lokaðir skólar á vegum hins opinbera, svo sem bankamannaskóli, brunamannaskóli, lögregluskóli, tollvarðaskóli og þar fram eftir götunum. Þetta vil ég sjá í hinu almenna skólakerfi.