Félagsmálaráðherra (Páll Pétursson) (andsvar):
Herra forseti. Ég er búinn að vera hér lengur en aðrir þingmenn og ég þekki æðimörg dæmi þess að mál hafa tekið breytingum í starfi þingsins. Ég tel það ekki nema sjálfsagðan hlut. Ég hef lengst af minni þingsetu verið óbreyttur þingmaður eða formaður í þingflokki og oftast nær í stjórnaraðstöðu vel að merkja. En ég átti í nefndum þátt í því að breyta fjöldamörgum stjfrv.
Þetta mál var ekki skoðað í félmrn. fyrr en í dag af eðlilegum ástæðum þar sem það var ekki ákveðið fyrr en á laugardag að frv. færi fram. Við vorum ekki með í undirbúningi málsins og á laugardaginn var ráðuneytið lokað og ég hafði ekki aðgang að starfsfólki þar.