[prenta uppsett í dálka] 32. fundur, 126. lþ.
Forsætisráðherra (Davíð Oddsson):
Herra forseti. Eins og kemur fram í þessu svari sem ég hef reyndar ekki við höndina, hefur það hlutfall sem hv. 6. þm. Norðurl. e. nefndi ekki versnað. Allmargar fastanefndir sem tengjast tilteknum stofnunum sem hafa aðsetur á höfuðborgarsvæðinu í eðli sínu skekkja þetta hlutfall nokkuð. Á hinn bóginn leitast ráðherrar við eins og fært er að í nefndunum séu fulltrúar sem geti fylgt úr hlaði sjónarmiðum sem tengjast landinu öllu. Þetta tekst ekki alltaf en menn reyna að hafa þetta í huga. Jafnframt vona ég að í þessum svörum komi líka fram að menn verða að gæta sín á því að horfa meira en áður til beggja kynja hvað nefndarskipanir varðar.
Ég tek undir það sem lýsir sér í máli málshefjanda að mikilvægt er að reyna að tryggja eins og fært er að jafnræði sé sem mest í þessum nefndum og sem flest sjónarmið komist þar til skila. En í sumum tilvikum er það dálítið erfitt eins og ég segi vegna þess að sumar nefndir eru bundnar tilteknum þáttum sem fram fara í Reykjavík.
