Menntamálaráðherra (Björn Bjarnason):
Herra forseti. Ljóst er að ekki er spurning um hvort hafist verður handa við arkitektanám hér á landi heldur hvenær. Það er rétt hjá hv. þm. að þetta hefur verið til umræðu bæði hvað varðar Listaháskóla Íslands og einnig Háskóla Íslands. Þeir skólar hafa í sjálfu sér ekki komið sér saman um neina niðurstöðu í málinu sem væri mjög æskilegt, en ég tel að þær viðræður sem nú fara fram á vettvangi menntmrn. við Háskóla Íslands um málið muni leiða til niðurstöðu sem gerir Háskóla Íslands kleift að taka ákvarðanir sem eru í samræmi við þau áform sem hann hefur uppi í þessu.