Katrín Fjeldsted:
Herra forseti. Tíundarsjóðir þeir sem hér eru til umræðu er fyrirkomulag sem verið hefur í um það bil áratug og komu til þegar farið var að innheimta komugjöld á heilsugæslustöðvum. Mér finnst ekki réttlátt eða maklegt að gefa í skyn að starfsfólk heilsugæslunnar hafi notað fé úr þeim sjóði til skemmtanahalds eða á ábyrgðarlausan hátt, eins og mátti skilja í fréttum í desember sl. í fjölmiðlum. Þessu fé hefur verið varið til ráðstefnuhalds og kynnisferða, fyrir utan tækja- og tölvukaup og endurbóta og vinnu við stefnumótun í heilsugæslunni.
Sagnfræðiáhugi fyrirspyrjanda hlýtur þetta að kallast núna þegar þessu fyrirkomulagi hefur verið breytt, en þessum peningum verður áfram haldið inni í rekstri stöðvanna eins og ráðherra hefur upplýst og verður áfram varið til afmarkaðra verkefna eins og verið hefur.