[prenta uppsett í dálka] 62. fundur, 127. lþ.
Ásta Möller (andsvar):
Herra forseti. Ég þakka þetta andsvar hv. þm. Ég hef um nokkurt skeið verið ósátt við áfengisstefnuna. Mér hefur fundist hún taka fremur mið af áherslu á misnotkun áfengis í stað þess að í áfengisstefnunni í heild sinni sé litið svo á sem það sé allt í lagi að drekka áfengi en taka þurfi á þeim málum sem varða misnotkunina.
Varðandi þá þrjá eða fjóra þætti sem stjórnvöld hafa gengið út frá í reglum sínum og lögum varðandi umgengni um áfengi þá snýr þetta frv. eingöngu að einkarétti til sölu á áfengi. Varðandi aðra þætti, m.a. auglýsingar á áfengi, get ég svarað því til að ég tel að það eigi að skoða það að rýmka auglýsingarþáttinn í þá veru að hann verði í anda upplýsingar, nánast á sama veg og ÁTVR hefur gert með upplýsingum um áfengi í gegnum vefinn og gegnum bæklingagerð.
Ég sé t.d. ekkert því til fyrirstöðu að blöð og tímarit, t.d. tímarit sem fjalla um mat, veiti upplýsingar um áfengi eins og þau gera í dag. Hins vegar er ég ekki tilbúin til þess að opna það á víðari grunni, leyfa auglýsingar í dagblöðum, sjónvarpi og slíkt. Ég tel að þetta eigi að vera á upplýsingagrunni og í þeim anda að umgengni um vín geti verið á menningarlegum nótum en ekki nótum misnotkunar.
Varðandi áfengiskaupaaldurinn þá var ég þeirrar skoðunar að hann ætti að lækka niður í 18 ár. (Forseti hringir.) Síðan fór ég að skoða málið --- en ég kem að því á eftir.
