[prenta uppsett í dálka] 78. fundur, 127. lþ.
Iðnaðarráðherra (Valgerður Sverrisdóttir) (andsvar):
Hæstv. forseti. Mér finnst þetta vera dæmigerð spurning frá Vinstri grænum, ,,hvað ef ekki``, því auðvitað vona þeir að ekki verði af þessum mikilvægu áformum sem eru uppi um stóriðjuframkvæmdir. Ég ítreka það sem ég hef áður sagt að ég hef fulla trú á því að af þessu verði og er þess vegna ekkert að útbúa aðrar tillögur í tengslum við þetta verkefni. Allt bendir til þess að þetta gangi upp og það er aðalatriðið.
Auðvitað eru ýmsar aðrar hugmyndir uppi um atvinnusköpun á landsbyggðinni almennt og við munum ræða þær betur þegar við fjöllum um byggðaáætlun sem er um það bil að koma inn í þingið. Eins og ég segi þá er dæmigert að þetta skuli koma frá Vinstri grænum vegna þess að þeir hafa nefnilega alls engar hugmyndir um hvað landsbyggðin á að taka sér fyrir hendur ef ekki verður af þessu verkefni.
