Karl V. Matthíasson:
Herra forseti. Menn verða að gera sér grein fyrir því að hægt er að vinna heilmörg störf í fjarvinnslu úti á landi en það er eins og áhugann vanti. Sagt hefur verið að stjórnsýslan hafi einfaldlega allt of lítinn áhuga á því að koma þessum verkefnum út á land. En það eru hæstv. ráðherrar sem stjórna í ráðuneytunum og þeir eiga að geta beitt sér af meira afli í þessum málum en raun ber vitni. Það er átakanlegt að taka á móti hverju svarinu af öðru, frá hverjum hæstv. ráðherranum á fætur öðrum við fyrirspurn hv. þm. Kristjáns Möllers. Þau eru frekar dauf, svörin, og lítið hefur orðið af því að verkefni séu komin út á land í þessa fjarvinnslu þannig að það er ekki nema von að menn kveinki sér þessa dagana.