Guðjón Guðmundsson (um atkvæðagreiðslu):
Herra forseti. Að sjálfsögðu á Alþingi að samþykkja þessa virkjunarheimild nú á vorþingi. Það er nauðsynlegt fyrir framhald málsins að virkjunarheimild sé til staðar þegar farið verður í viðræður við önnur fyrirtæki en Norsk Hydro, um byggingu og rekstur álvers í Reyðarfirði, en ný viðræðunefnd hefur verið skipuð í það verkefni undir forustu Finns Ingólfssonar, fyrrv. iðnrh.
Verði virkjunarheimildin ekki samþykkt mætti líta á það sem skilaboð um að Kárahnjúkavirkjun sé frátekin fyrir Norsk Hydro. Það væri ekki gott upplegg í þær mikilvægu viðræður sem fram undan eru, viðræður sem skipta atvinnulífið á Austurlandi gífurlegu máli. Því er nauðsynlegt að ljúka afgreiðslu þessa á næstu dögum og gera það að lögum.