Guðrún Ögmundsdóttir:
Virðulegur forseti. Ég skrifaði undir nál. með fyrirvara ásamt hv. þm. Ögmundi Jónassyni sem einnig er með fyrirvara, vegna þess að nú erum við kannski að sjá það í fyrsta skipti, þannig að þetta er söguleg stund hér á Alþingi, að talað sé um hryðjuverk í íslenskum lögum. Við höfum áður talað um skemmdarverk. Þetta frv. er auðvitað fyrst og fremst liður í því að viðurkenna alþjóðlega samninga, en hefur jafnframt þessi áhrif og við ræddum það í gær að þetta væri kannski líka stærra mál í tilfinningalegum skilningi.