Menntamálaráðherra (Tómas Ingi Olrich):
Herra forseti. Það er rétt að vera ekki að blanda inn í þetta öðrum málum eins og uppsagnarmálum og úrskurði ráðuneytisins í þeim.
Ég vil taka undir það með hv. þm. Sigríði Jóhannesdóttur að mér finnst ástæða til að harma þessa stöðu, full ástæða til þess. En það er nú einu sinni svo að í gildi er samningur um flutning á starfsemi Kvikmyndasafns Íslands til Hafnarfjarðar. Samkvæmt þeim samningi leggur Hafnarfjarðarbær safninu til endurgjaldslaust húsnæði í Bæjarbíói, við Strandgötu, í allt að 15 ár en ekki skemur en 10 ár.
Þegar litið er á þennan samning í heild er ljóst að hann lýsir sameiginlegum vilja og lítur á það sem sameiginlegt verkefni að hlúa að safninu í Hafnarfirði. Það er því fullkomlega eðlilegt að rætt sé við Hafnarfjarðarbæ hvernig þeim anda samningsins verði framfylgt. Það eru viðræður sem eiga að fara fram milli ríkisins og Hafnarfjarðarbæjar. Í þessu skyni hefur verið skipaður vinnuhópur í ráðuneytinu sem hefur verið falið að ræða við forsvarsmenn Hafnarfjarðarbæjar. Á þessu stigi málsins og í anda þessa samkomulags eru engin efni til þess að ætla annað en að niðurstaða fáist í því máli.
Ráðuneytið mun ekki geta fallist á annað en Hafnarfjarðarbær sjái safninu fyrir húsnæði undir starfsemina og greiði fyrir þær endurbætur þannig að húsakynni kvikmyndasafnsins verði sambærileg við það sem safnið hefur nú.