[24:54]

Frsm. meiri hluta iðnn. (Guðjón Guðmundsson) (andsvar):

Herra forseti. Hv. þm. þykir ekki mikið til tillögunnar koma og auðvitað má alltaf deila um það hvernig á að setja upp byggðaáætlun. Byggðaáætlunin síðasta sem rann út um síðustu áramót var allt öðruvísi uppbyggð og tókst ágætlega. En hv. þm. segir að þessi tillaga sé hvorki fugl né fiskur, fimm stafliðir og ekki til þess fallin að þoka áfram byggðamálunum. En ég minni á að bak við þá fimm stafliði eru 22 tillögur um aðgerðir og þó að hv. þm. talaði heldur niðrandi um þær tillögur sem meiri hluti iðnn. er að gera, þá er þar verið að bæta 11 atriðum við þennan aðgerðalista. Auðvitað munu stjórnvöld taka tillit til þess sem Alþingi er að samþykkja, ekki bara þessara fimm fyrstu stafliða heldur þess aðgerðalista sem liggur bak við þessar samþykktir. Þó það nú væri.

Hv. þm. segir að þeir sem semja slíkar tillögur skuli sjálfir bera ábyrgð á því og Samfylkingin muni sitja hjá. Við erum að vísu ekki mjög óvön því að Samfylkingin sitji hjá, en ég spyr: Hvar eru tillögur Samfylkingarinnar? Það er hérna ágætisnefndarálit og hv. þm. flutti ágæta ræðu, en það er ekki ein einasta brtt. lögð fram á þinginu sem þingmenn fá að taka afstöðu til.

Hv. þm. er að tala um að ekki verði tekin afstaða á þinginu til tillagna meiri hlutans. En hvar eru tillögur Samfylkingarinnar? Ég hef ekki orðið var við þær.

Ég vil síðan minna á að það var ekki meiri hluti iðnn. sem samdi tillöguna, en meiri hlutinn vann sitt verk að sjálfsögðu út frá þeirri hugmyndafræði sem fram kemur í tillögu ráðherra og með því að bæta 11 atriðum við aðgerðalistann og m.a. að draga úr því mikla vægi sem Akureyri hafði í upphaflegu tillögunni. Nú er lögð mikil áhersla á fleiri byggðakjarna og vaxtarsvæði og jaðarsvæði þannig að ég held að með tillögum okkar séum við í meiri hlutanum að bæta þessar tillögur.