Ögmundur Jónasson (andsvar):
Herra forseti. Hæstv. fjmrh. fullyrðir að komið hafi verið til móts við öryrkja á Íslandi. Hér fóru fram einhverjar mestu umræður í sögu Alþingis um frægan dóm Hæstaréttar sem ríkisstjórn Íslands gekk gegn og Öryrkjabandalagið, sem var að halda upp á afmæli sitt fyrir fáeinum dögum, lýsir því yfir að öryrkjar á Íslandi búi við lögskipaða fjárhagsneyð.
Sá öryrki sem mestar bætur getur fengið fær 80 þús. kr. úr ríkissjóði. Fjárhaldsmaður þessa sjóðs, hæstv. fjmrh., hefur talað fyrir skattkerfisbreytingum sem fela í sér umtalsverðar skattalækkanir hjá þeim fyrirtækjum á Íslandi sem skila hagnaði. Þetta er gert á sama tíma og virtar eru að vettugi kröfur og óskir frá íslenskum öryrkjum og Öryrkjabandalaginu.
Ég endurtek spurningu mína við hæstv. fjmrh.: Hvernig svarar hann Öryrkjabandalagi Íslands?