[prenta uppsett í dálka] 6. fundur, 127. lþ.
Örlygur Hnefill Jónsson (andsvar):
Herra forseti. Það er gott mál og göfugt, eins og hv. 12. þm. Reykv. benti á í máli sínu, að laða hingað fyrirtæki og þá jafnframt að styrkja þau fyrirtæki sem fyrir eru í landinu.
En ég vil benda hv. 12. þm. Reykv. og hæstv. fjmrh. á að miklu skiptir að þau fyrirtæki geti jafnt átt heimilisfesti á landsbyggðinni og á höfuðborgarsvæðinu og skapað þar atvinnu. Þetta verður að skoða við meðferð þessa frv., m.a. með tilliti til tryggingagjalds eins og formaður Samfylkingarinnar benti á fyrr í dag í ræðu sinni um þetta frv.
Ég vil því spyrja 12. þm. Reykv.: Er hann ekki sammála mér um að skilyrði fyrirtækjanna verði gerð jafngóð á landsbyggðinni og á höfuðborgarsvæðinu og að það sé réttlætismál?
