[prenta uppsett í dálka] 20. fundur, 127. lþ.
Kristján Pálsson (andsvar):
Herra forseti. Það er gott að hv. þm. áttar sig á hvað það er margt í þessu frv. sem í raun er að opna möguleika smábáta til þess að bjarga sér betur en þeir höfðu áður gert. Í 3. gr. eru náttúrlega þessi 2.300 tonn sem er á valdi ráðherra að úthluta.
En varðandi annað sem hv. þm. minntist á, sátt við sjómenn --- ég heyri ekki annað á þeim sjómönnum sem ég umgengst á mínu svæði en að þeir séu bara mjög þokkalega sáttir. Ég er ekki að segja að það sé 100% en það er mjög mikill einhugur að verða um það að ganga þessa leið, miklu meiri en var sem skiljalegt er enda var mikill hugur í mönnum þegar þessi umræða hófst. Ég heyri á mjög mörgum þessara manna að þeir hugsa sér gott til glóðarinnar að geta fjárfest og tryggt afkomu sína um ókomna tíð.
