Árni Steinar Jóhannsson:
Virðulegi forseti. Ég vil að það komi fram í umræðunni að ég held að við vanmetum þá stöðu sem við erum í í skógræktarmálum í dag. Vinnubrögð í þeim málaflokki hafa gjörbreyst á síðustu 20--30 árum. Unnin eru svæðisskipulög fyrir landið. Unnið er aðalskipulag fyrir sveitarfélög og síðan deiliskipulög. Og ég fullyrði að við eigum mjög gott og fært fagfólk á því sviði í dag sem hefur komið til starfa á allra síðustu árum.
Vinna þessa fólks byggir auðvitað á landslögum. Hún byggir á samþykktum eins og Bernarsamningnum. Hún byggir á því að menn hafa til hliðsjónar mat á umhverfisáhrifum. Hvergi, a.m.k. í þéttbýli, er unnið öðruvísi en á grunni þessara laga. Það fullyrði ég. Meira að segja á grunni Staðardagskrár 21. Ég vil að þetta komi fram í umræðunni. Ég held að við höfum óþarfa áhyggjur að mörgu leyti. En svæðisskipulagsvinnuna þarf eflaust að bæta í dreifbýlinu.