[prenta uppsett í dálka] 40. fundur, 127. lþ.
Ögmundur Jónasson (andsvar):
Hæstv. forseti. Þetta er alrangt. Árás Bandaríkjamanna á Afganistan byggir ekki á samþykkt öryggisráðsins. Bandaríkjamenn kynntu hins vegar, og það gerðu Bretar einnig, fastafulltrúar þeirra í öryggisráðinu, á hvaða forsendum þeir hefðu gert árás á Afganistan, að það væri á grundvelli 51. gr. stofnsáttmála Sameinuðu þjóðanna, og þeir kynntu þetta í öryggisráðinu. Formaður öryggisráðsins, Írinn Ryes, gaf síðan út yfirlýsingu þar sem fram kom að þessi afstaða Bandaríkjamanna og Breta hefði verið kynnt í öryggisráðinu og síðar var vísað í samþykkt öryggisráðsins sem byggði á þeim yfirlýsingum sem Kofi Annan hafði áður sett fram um að alþjóðasamfélagið ætti að beita sér á grundvelli pólitískra, diplómatískra og fjárhagslegra aðgerða til að uppræta hryðjuverk.
