Kristján Pálsson (andsvar):
Herra forseti. Ég þakka hæstv. iðnrh. fyrir skýrsluna. Mig langar aðeins til að spyrja hér um eitt lítið atriði. Á bls. 2 stendur, með leyfi forseta:
,,Atvinnulíf á landsbyggðinni þarf greiðan aðgang að lánsfé á sambærilegum kjörum og bjóðast á höfuðborgarsvæðinu og veita þarf fjárfestingarstyrki í samræmi við það sem tíðkast erlendis.``
Mig langaði aðeins að spyrja hæstv. ráðherra hvort einhverjar hugmyndir séu í gangi um að breyta þessari skilgreiningu á höfuðborgarsvæðinu.
Fram að þessu hefur höfuðborgarsvæðið í mínum huga þýtt sveitarfélögin í kringum höfuðborgina, þ.e. Hafnarfjörður og Kópavogur í suðri og núna er það Kjalarnes í norðri og Mosfellsbær í austri. Aftur á móti hafa svæði eins og Suðurnesin, Árborgarsvæðið og Akranes verið fyrir utan þó að þau teljist næst.
Ég spyr vegna þess að í nýju byggðakorti ESA var ákveðinn hluti Suðurnesjanna felldur út af kortinu og það hefur ákveðnar afleiðingar. Því vildi ég heyra frá hæstv. ráðherra hvort einhverjar hugmyndir væru um frekari breytingar á þessari skilgreiningu um höfuðborgarsvæðið.