Kolbrún Halldórsdóttir:
Herra forseti. Vinstri hreyfingin -- grænt framboð styður öflugan samráðsvettvang á sviði umhverfis- og náttúruverndar. Þótt við séum ósammála því að nauðsynlegt hafi verið að leggja Náttúruverndarráð niður föllumst við á þau rök að öflugt umhverfisþing sem undirbúið verði í formlega skilgreindu samráði umhvrn., frjálsra félagasamtaka og fagfólks á sviði umhverfis- og náttúruverndar og náttúruvísinda geti komið í stað þess náttúruverndarþings sem lög þau sem hér eru til afgreiðslu gerðu áður ráð fyrir.
Í trausti þess að umhverfisþing verði slíkur vettvangur greiðum við, þingmenn Vinstri hreyfingarinnar -- græns framboðs, málinu atkvæði okkar.