Ásta R. Jóhannesdóttir:
Herra forseti. Við erum að fjalla um frv. til laga um breytingu á lögum um vatnsveitur sveitarfélaga. Þetta er frv. sem var til umfjöllunar á síðasta þingi og kom þá til hv. félmn. Þar var það langt komið í vinnslu en var ekki afgreitt úr nefndinni. Hér hefur verið bætt inn í frv. breytingum í samræmi við umsagnir sem bárust nefndinni við vinnslu þess á síðasta þingi.
Samfylkingin hefur verið hlynnt því að það eigi að vera á valdi sveitarfélaganna hvernig þau haga rekstri sínum á fyrirtækjum eins og vatnsveitum. Við teljum eðlilegt að sama gildi um vatnsveitur eins og t.d. hitaveitur og rafveitur, eins og lagt er til í þessu frv. Einnig eru lagðar til ýmsar aðrar breytingar sem auka sveigjanleika í stjórn vatnsveitna og við teljum það eðlilegt. Þar sem ég á sæti í hv. félmn. þá munum við auðvitað fara yfir þetta mál lið fyrir lið þegar það kemur til nefndarinnar og skoða nánar. Í fljótu bragði get ég ekki séð annað en að þær breytingar sem lagðar eru til hér eftir umsagnirnar sem komu á síðasta þingi séu yfirleitt til bóta. Ég mun hins vegar koma frekar að vinnslu málsins í nefndinni.