Forsætisráðherra (Davíð Oddsson):
Herra forseti. Samkvæmt þeim upplýsingum sem ég hef frá utanrrn. var fyrir nokkrum vikum viðbúnaður og viðbragðsstig í Bandaríkjunum aukið í næsthæsta stig. Að vísu mun það hafa lækkað síðan aftur frá þeim tíma. En á sama tíma var ákveðið að viðbúnaðarstigið í Keflavík skyldi einnig hækkað vegna aukinnar hættu á hryðjuverkum. Þess vegna hefur viðbúnaður verið meiri af hálfu Bandaríkjamanna á Keflavíkurflugvelli og af hálfu íslenskra yfirvalda en ella væri. Það er sem sagt óttinn við hryðjuverk á þessum viðkvæmu tímum sem hefur orðið til þess að viðbúnaður hefur að nokkru verið aukinn.