Halldór Blöndal (andsvar):
Herra forseti. Hv. þm. er að vísa til þess að hægt sé að stytta leiðina til Akureyrar með því að fara Svínvetningabraut og aka fram hjá Blönduósi. (GE: Það voru ekki mín orð. Þetta er bara að ljúga.) Það er ekki um neitt annað að ræða. Álit Vegagerðarinnar á þeim möguleikum sem eru fyrir hendi liggur fyrir, þ.e. annars vegar að fara Svínvetningabraut fram hjá Blönduósi og það er hins vegar að fara beint yfir í Skagafjörð fram hjá Varmahlíð. Það er á þessa tvo vegu sem rætt er um að hægt sé að stytta leiðina.
Nú veit ég ekki hvort hv. þm. hefur kynnt sér þessa skýrslu. (GE: Ágætlega.) Hún liggur fyrir. Hv. þm. á þess vegna að vita hvað hann segir.
Hitt skal ég segja við hann að ef hv. þm. heldur að ekki verði komið bundið slitlag á Djúpveginn fyrr en árið 2012 þá er rétt að hann lesi plögg sín betur.