Gísli S. Einarsson:
Virðulegur forseti. Aðeins ofan á þessa umræðu sem bæði fór hér fram áðan og nú um stöðu löggæslumála víða um land. Hér áðan var Búðardalur nefndur og það svæði. Þar er einn löggæslumaður og hann á ekki einu sinni möguleika á því að framkvæma það eftirlit sem hann þarf. Hann er nánast bjargarlaus nema ökumaður sem hann stöðvar vegna of hraðs aksturs viðurkenni á staðnum að hann hafi raunverulega verið að brjóta af sér. Hið sama má segja um embættin víða um land.
Hjá sýslumannsembættinu á Hólmavík velta menn vöngum yfir því hvort heldur eigi að vera með góðan lögreglubíl og einn lögreglumann eða tvo lögreglumenn og lélegan lögreglubíl. Svona er ástandið í þessum málum mjög víða um land. Á þessu þarf að taka. Þess vegna er verið að ræða máliið á Alþingi.