[prenta uppsett í dálka] 18. fundur, 128. lþ.
Guðmundur Hallvarðsson:
Herra forseti. Ég vil þakka fyrirspyrjanda fyrir þessa fyrirspurn til heilbrrh. Sannleikurinn er sá að vandinn er einna mestur hér í Reykjavík hvað vistunarþörf fyrir aldraða sjúklinga áhrærir.
Eins og fram hefur komið eru 258 manns í Reykjavík í brýnni eða mjög brýnni þörf og fer fjölgandi. Hins vegar vekur það athygli mína í svörum hæstv. heilbrrh. að aðilar hafi sóst eftir að byggja hjúkrunarrými en hins vegar virðist skorta stefnumótun eða framtíðarsýn í ráðuneytinu til að taka á málunum. Hvað vill ráðuneytið sjálft? Hvernig ætlar það að halda á málum? Hvað leggur það til?
Það er ljóst að breytingar, t.d. á Vífilsstaðaspítala sem munu koma til umræðu á eftir, eru bara plástur á þann vanda sem við stöndum frammi fyrir.
Í annan stað vildi ég geta þess að fyrir liggur vistunarmat fyrir 178 manns sem þurfa að komast á vistheimili og eru í mjög brýnni eða brýnni þörf. Hver er staða þeirra aðila?
