Fyrirspyrjandi (Þorgerður K. Gunnarsdóttir):
Herra forseti. Ég þakka hæstv. menntmrh. fyrir svar hans en ég held að það sé alveg einboðið að það verði að fara að einhenda sér í að skipuleggja húsnæðismál Tækniháskólans. Ég hvet um leið forráðamenn Tækniháskólans og nýskipaðan rektor til að sýna frumkvæði í því að setja fram hugmyndir í húsnæðismálum þessa nýstofnaða háskóla. Það er afskaplega mikilvægt, ekki bara fyrir háskólann sjálfan heldur líka fyrir nýjungar og nýsköpun í samfélagi okkar þannig að það verði ákveðin gerjun í samfélaginu. Hún gæti sem best tengst nákvæmlega þessum svæðum sem ég nefndi áðan, í Garðabæ eða Kópavogi. Það væri afskaplega gott fyrir Tækniháskóla Íslands sem er ákveðin vítamínsprauta í atvinnulífinu.