Ísólfur Gylfi Pálmason:
Herra forseti. Ég vil þakka hv. þm. Hjálmari Árnasyni fyrir að vekja máls á þessu og þakka hæstv. menntmrh. fyrir svörin.
Hér er um að ræða mjög stórt og brýnt mál sem snertir í raun þjóðina alla. Tækninni fleygir fram og það er einn allra jákvæðasti þáttur sem hugsast getur við símenntun þjóðarinnar að nýta þessa tækni. Þess vegna er nauðsynlegt að vekja athygli á því að allir landsmenn þurfa að hafa möguleika að stunda slíkt nám.
Oft er okkur fulltrúum í fjárln. legið á hálsi fyrir að vera með tilviljunarkenndar fjárveitingar eins og stundum er sagt. En það er einmitt í gegnum fjárlögin sem við höfum stutt við fjarnám. Þetta skiptir heilmiklu máli fyrir byggðarlög landsins. Fjárln. hefur í gegnum árin tekið upp á sitt eindæmi, get ég sagt, þó í góðu samráði við ráðherra og ríkisstjórn, að styrkja þessa möguleika. Hér er um afar brýnt mál að ræða fyrir landið allt.