[prenta uppsett í dálka] 29. fundur, 128. lþ.
Margrét Frímannsdóttir:
Virðulegi forseti. Við erum nú eiginlega búin að fá þetta skriflega svar hæstv. ráðherra, vegna þess að allt verður þetta nú líklega fest á blað, allar þær tölur sem hann þuldi hér upp án þess að nokkur möguleiki væri á því að ná þeim jafnóðum. En þetta er fyrirspurn sem hér er flutt af hv. þm. Ísólfi Gylfa Pálmasyni, sem er mál nr. 98 og var lagt fram á fyrstu vikum þingsins. Sambærileg fyrirspurn er síðan á þskj. 305, tiltölulega nýleg fyrirspurn sama efnis frá hv. þm. Kjartani Ólafssyni og ég lít þannig á að þar hljóti aðeins að vera um ítarefni að ræða.
Ég tek undir það sem fram kom hjá hv. fyrirspyrjanda. Það skiptir höfuðmáli fyrir uppbyggingu atvinnulífs í Vestmannaeyjum að ferðir þangað séu reglubundnar. Ekki má miða við einhverja álagstoppa, ef við ætlum að byggja þar á ferðaþjónustu sem möguleikarnir eru miklir til í Eyjum og þá verða að vera öruggar ferðir þangað, vegna þess að þeim fjölgar stöðugt sem koma hingað í svokallaðar pakkaferðir tvo, þrjá daga og hverfa síðan af landi brott og þeir fara ekki til Eyja nema um ferðaöryggi sé að ræða.
