Ásta R. Jóhannesdóttir (andsvar):
Ég vil svara þessu andsvari með því að taka undir það. Þetta er rétt. Nefndin var sammála um að það yrði að taka á þessu máli. Einnig gerði ég þetta atriði að umtalsefni þegar málið var hér til 1. umr. og spurði hæstv. heilbrrh. út í kjarabætur til þessa hóps. Hann tók ekki illa í að leiðrétta þau kjör þó að menn hafi ekki talið sig geta gert það fyrir áramótin vegna fjárlaganna sem nýbúið er að samþykkja.
Ég minni hins vegar á að það er hægt að setja þessar breytingar inn á fjáraukalög, annað eins hefur nú verið gert í gegnum tíðina. Þetta eru ekki nema 68 milljónir sem þetta kostar fyrir þennan stóra hóp sem er svona illa settur. Ég treysti því á að hv. þm. Katrín Fjeldsted og félagar hennar haldi þessu máli vakandi og tryggi að breytingin verði gerð fyrr en síðar.