Ásgeir Friðgeirsson:
Virðulegi forseti. Það er rétt að hér á landi hvílir ekki skylda á hinu opinbera að bjóða út fjarskiptaþjónustu og eftir því sem ég best veit er það eina landið í Evrópu eða innan Evrópska efnahagssvæðisins sem svo er fyrir komið. Ég held að það sé jafnvel ástæða til að endurskoða það og setja í lög að fjmrh. beri að fara vel með það fé sem honum er treyst fyrir hvað þetta varðar.
Það kom fram í svari hæstv. ráðherra að mál þetta sé í skoðun. Ég vil bara minna á það að tíminn kostar peninga. Í þrjú ár hefur verið möguleiki á að bjóða út fjarskiptaþjónustu hins opinbera og miðað við þær tölur sem ég nefndi áðan þá er þar hugsanlega einn milljarður sem hafi farið fyrir borð á þessum árum. Það má nýta þá peninga til annarra hluta.