Flm. (Sigurjón Þórðarson) (andsvar):
Frú forseti. Það er ágætt að það sé komið á hreint hvað varðar fjölda skipafélaganna. En varðandi það að íslensk skipafélög séu bara í samkeppni innan lands má horfa til þess að með samþykkt tillögunnar gæti verið að íslenskar útgerðir gætu hafið útrás með íslenska sjómenn. Ef þáltill. gæti leitt af sér skattalækkun á útgerðir og að íslenskir sjómenn væru í meira mæli í erlendum verkefnum, tel ég það af hinu góða.
Sú staða gæti vel komið upp eftir að þáltill. væri samþykkt að við lækkum í raun skatta á útgerðir, en þegar upp er staðið gæti skattalækkunin einfaldlega skapað meiri tekjur fyrir ríkissjóð en ef ekki væri af stað farið, því ef við skoðum hlutina nú: Hverjar eru tekjur Íslendinga af útlensku sjómönnunum um borð í Keili? Eru þær nokkrar?