[prenta uppsett í dálka] 79. fundur, 130. lþ.
Utanríkisráðherra (Halldór Ásgrímsson):
Frú forseti. Með þessari þáltill. er leitað heimildar Alþingis til að staðfesta fyrir Íslands hönd ákvörðun sameiginlegu EES-nefndarinnar um breytingu á IX. viðauka við EES-samninginn og fella inn í samninginn tilskipun Evrópuþingsins og ráðsins um ráðstafanir gegn því að fjármálakerfið sé notað til peningaþvættis. Gerð er grein fyrir efni þessarar ákvörðunar í tillögunni. Hún er prentuð sem fylgiskjal með henni ásamt þeirri tilskipun sem hér um ræðir.
Ákvörðun þessi kallar á lagabreytingar hér á landi og var tekin af sameiginlegu EES-nefndinni með stjórnskipulegum fyrirvara af Íslands hálfu eins og venja er til.
Varðandi efnisatriði nægir að nefna að með þessari ákvörðun er verið að fella inn í EES-samninginn ákvörðun tilskipun Evrópusambandsins um aðgerðir gegn peningaþvætti. Þessi tilskipun felur í sér breytingar á eldri tilskipun um þetta efni sem er hluti EES-samningsins. Með þessum breytingum er gildissvið tilskipunarinnar rýmkað auk þess að gerðar eru ýmsar smærri tæknilegar breytingar á eldri tilskipun.
Þessi tilskipun kallar á breytingar á almennum hegningarlögum hvað varðar svik sem beinast að fjárhagslegum hagsmunum en í dómsmrn. er verið að vinna að gerð lagafrv. af þessu tilefni.
Ég legg til, frú forseti, að að lokinni þessari umræðu verði tillögunni vísað til hv. utanrmn.
