Utanríkisráðherra (Halldór Ásgrímsson):
Herra forseti. Ég hef nýlega gert utanrmn. grein fyrir stöðu þessara mála og ekkert hefur breyst síðan ég gerði nefndinni ítarlega grein fyrir málinu. Hæstv. forsrh. er í New York sem heiðursgestur Íslensk-ameríska verslunarfélagsins og aðalræðumaður á fundi þess auk þess sem hann hefur opnað merka listsýningu í New York á verkum Errós. Hann mun eingöngu vera í New York. Hitt er svo annað mál að bæði fulltrúar utanrrn. og forsrn. nota hvert tækifæri sem þeir fá með formlegum eða óformlegum hætti til að koma sjónarmiðum Íslands á framfæri í þessu máli. En í þessari heimsókn forsrh. eru engar slíkar formlegar viðræður fyrirhugaðar.