[prenta uppsett í dálka] 97. fundur, 130. lþ.
Landbúnaðarráðherra (Guðni Ágústsson) (andsvar):
Hæstv. forseti. Ég verð að lýsa því yfir sem ráðherra að flest þau mál sem ég hef flutt í minni tíð hafa fengið góða meðferð í þinginu og oft komið betri út en þau komu inn. Ég treysti sannarlega þinginu og þingið er til þess, löggjafarsamkoman, að fara yfir vafaatriði málsins, endurskoða, hlusta á raddir þeirra sem kallaðir verða til og breyta í samræmi við þær. Ég segi því við þingið: Í ykkar hendur er málið falið. Ég hef rætt það bæði við formann landbn., hv. þm. Drífu Hjartardóttur, og varaformann, hv. þm. Magnús Stefánsson, sem sátu í nefndinni um málið og lögðu það í mínar hendur að mörgu leyti með því fólki sem með þeim vann, að það verði að fara vel yfir gagnrýnisatriðin í nefndarstarfinu og meta þau út frá hagsmunum Landbúnaðarháskóla Íslands í framtíðinni og ekki síður landbúnaðarins og í leiðinni þess trúverðugleika sem ég tel mikilvægt að ríki um val á æðstu mönnum við slíka stofnun.
