Ögmundur Jónasson (andsvar):
Hæstv. forseti. Þetta var að mörgu leyti mjög góð ræða sem hér var flutt þó ég sé ósammála flestu sem þar var sagt. Hv. þm. spyr um afstöðu Vinstri hreyfingarinnar -- græns framboðs. Ég reyndi í máli mínu áðan að sýna fram á samfelluna sem er og hefur verið í okkar málflutningi. Hv. þm. spurði hvað hefði breyst í okkar afstöðu frá því sparisjóðalögin voru samþykkt fyrr á árinu. Ekkert, það hefur ekkert breyst. Þó að tilefni þeirrar lagasetningar hafi verið atburðir sem voru að gerast hjá SPRON þá var með lögunum verið að taka á miklu stærra máli, fyrirsjáanlegri röð samninga sem mundu tefla sparisjóðakerfinu í landinu í tvísýnu. Þetta vita menn.
Hinu vil ég mótmæla, það er því viðhorfi sem fram kom hjá hv. þm. til starfsmanna Norðurljósa. Hann gerir því skóna að þeir lúti í einu og öllu vilja forstjóra þess fyrirtækis. (Forseti hringir.) Þetta er kannski ekki undarlegt úr reynsluheimi Sjálfstæðisflokksins. Margur heldur mig sig, segir máltækið.