[prenta uppsett í dálka] 121. fundur, 130. lþ.
Mörður Árnason (um fundarstjórn):
Forseti. Áðan bað ég um að túlkuð yrði í forsetastóli 1. mgr. 53. gr. þingskapa. Við því hefur að vísu ekki verið orðið. En það er gott sem gamlir kveða. Þeir sögðu stundum að þögn væri sama og samþykki. Ég tek það svo að forseti hafi samþykkt túlkun mína á 53. gr.
Þá er næst að spyrja, vegna þess að spurningin var fram borin við einn hv. þm., formann allshn., sem ég tel í framhaldi af þessari túlkun að sé skylt að vera við umræðuna: Hvar er þessi hv. þm., formaður allshn., Bjarni Benediktsson? Hann er nýr þingmaður á þinginu eins og ég sjálfur. Þau litlu kynni sem ég hef af honum haft eru ákaflega góð. Mér hefur virst hann háttprúður og kurteis þingmaður. Hann er vissulega fastur fyrir þegar kemur að hans málstað en hann er alls ekki haldinn neinum göllum í skapsmunum eða brigðlyndi sem gæti skýrt fjarveru hans. Þess vegna álykta ég sem svo að hv. þm. hafi forföll og sé á fjarvistarskrá. Ég veit ekki til þess, og hef þó fylgst með þingstörfum í dag, að það hafi verið tilkynnt. Ég minnist þess ekki að ég hafi séð nafn hans á slíkri skrá. Ég spyr hvort hann hafi fjarvistarleyfi. Forseti, er það kannski svo að þingmaðurinn hafi, án þess að ég hafi tekið eftir, forfallast svo að nauðsyn krefji að varamaður hans taki sæti á meðan, að hann hafi tilkynnt forseta það bréflega og gert grein fyrir forföllum sínum og hversu lengi þau mundu vara? Getur verið forseti hafi lesið þetta bréf í upphafi þingfundar í dag? Það hefur farið fram hjá mér og ég biðst þá afsökunar á því en spyr, þótt seint sé, því að í 53. gr. segir að forseti kynni þinginu bréfið.
Sé þetta raunin spyr ég enn fremur um hver er varamaður hv. þm. og einnig um hver gegnir störfum fyrir hann í allshn. Þar sem hann er formaður allshn. þá hlýtur varaformaðurinn eða einhver sem hann hefur sérstaklega tilnefnt til þeirra verka að koma í hans stað, sitja og fylgjast með umræðunni og vera til taks þegar þarf að fylgja því máli fram sem nú er á forræði allshn. og í sérstakri umsjá formanns allshn. Um þetta spyr ég. Ég vil fá svar frá forseta um þetta efni. Að vissu leyti liggur við virðing þingsins og ekki síður virðing hv. þm. Bjarna Benediktssonar, formanns allshn.
