Ágúst Ólafur Ágústsson (um atkvæðagreiðslu):
Herra forseti. Við í Samf. fögnum þeirri jákvæðu kerfisbreytingu sem felst í aldurstengdri örorkuuppbót. Hins vegar teljum við ekki að það sé verið að uppfylla það samkomulag sem hæstv. heilbrrh. gerði við Öryrkjabandalag Íslands þann 25. mars sl. Í raun eru einungis tveir aðilar í samfélaginu sem telja framlagt frumvarp hæstv. heilbrrh. uppfylla samkomulagið og það eru Framsfl. og Sjálfstfl. Hagsmunasamtök og nánast allir fjölmiðlar landsins hafa hvatt ríkisstjórnarflokkana til að uppfylla samkomulagið í anda þeirrar brtt. sem minni hluti heilbrn. hefur lagt fram. Hæstv. heilbrrh. hefur meira að segja viðurkennt að með þeirri fjárhæð sem frv. felur í sé einungis verið að uppfylla 2/3 samkomulagsins og hefur hann talað um áfangaskiptingu samkomulags sem alls ekki átti að vera áfangaskipt.
Ef meiri hluti Alþingis fellir brtt. minni hlutans munu þingmenn Samf. vísa allri ábyrgð á útfærslu þessa máls á ríkisstjórnarflokkana og sitja hjá við afgreiðslu frv.